اليوم الاخبر : دايما كنت بسمع عنه اول مرة اشوفه - الجزء الاول

الطفولة .. اكتر حاجة بفتكرها و انا صغير .. الفسح و الناس اللي فسحتني ..و دايما شايل لهم الجميل ده و لغاية دلوقتي بحب ناس اوي بس عشان فسحتني وانا صغير ..فقررت اني لازم اسيب ذكرى حلوة عند حد ..و كأي واحد مش متجوز .. قررت أخد العيال حديقة الحيوان .. اكيد مش عيالي يا عم بقولك مش متجوز .. اطفال العيلة .. لينا الشهيرة بلولو ..مأوحة و غلباوية .. ريتال الشهيرة بروتي ..هادية موت .. فارس الشهير بتيتو ..بلطجي ومسجل خطر.. عمر الشهير بموري ..غلبان و ابن حلال مصفي بيصدق اي حاجة ..

اطفالي الحلوين .. انا قررت اوديكم النهاردة حديقة الحيوااااااان .. فرحة لا توصف .. هيصة ما بعدها هيصة .. امل في فسحة احلى شوفتها في عيونهم.. و جاء اليوم المرتقب .. يالا اركبوا .. تحبوا تسمعوا اغاني؟ .. ااااه

تسمعي اغنية ايه يا لولو؟ ..احب اسمع اغنية حجرين عالشيشة ..

مين؟.. (مسبهلا ) .. يا امي انتي بيبي ..حاولي تساعديني اعيش اللحظة يا لولو اني بفسح بيبيهات ..فاهمة حاجة؟

تسمعي ايه يا روتي يا حبيبتي؟ اسمع الواحد واقف مظبوط و الاتنين بتبص عليه .. و التلاتة بسنـــ ...

(مقاطعا) ماشي ماشي محمد فؤاد يعني ...

تسمع ايه يا تيتو ؟ .. يا عم اي حاجة ايه الأيف ده

ياض انت الفسحة لسه طويلة اتلم لا اناولك ...

تسمع ايه يا موري يا طيب انت ؟

موري يضحك ..

تسمع ايه؟ بتحب اغنية ايه؟

موري يضحك اكثر ..

لأ كدة مش هنخلص .. انا هختارلكم اغنية هتعجبكم اوي بجد

وبدأت الاغنية :

ما نرضااااش يخاصم الجمر السماااا ما نرضاش تدوس البشر بعضهاا يموت جواا جلبي ندااا

و الاغنية قربت تخلص خلاص .. يهمني الانسان ولو ما لوش عنوان يا ناس يا ناس ..هي دي الحدوته
حدووووته مصرية

انا منسجما : حدوووتة مصرية حدووتة مصريييية ..هيييه الله عليك يا كينج .. ها ايه رايكم في الاغنية؟

ايه رايكم يا عيال ؟ ..لولو ؟ روتي ؟ تيتوو؟ موووري؟

( محبطا ) انتم نمتم ؟!! .. طيب

وصلنا حديقة الحيوان .. اصحوا يا عيال وصلنا خلاص .. يالا يالا .. حظكم حلو اوي يظهر ان احنا جينا بدري ..الحديقة فاضية و مفيش طوابير على شباك التذاكر زي ما كنت باجي زمان .. ياه ياولاد زمان بقى ..

تيتو مقاطعا : يا عم خيصنا بقى هندخي ويا يأه

انا : هندخل يا بجرة .. انزلوا يالا ..

و على شباك التذاكر موظف نايم ..لو سمحت ..لوسمحت معلش (مهشكا كتفه ) ..قلقناك في نومتك بس اصل العيال شبطوا عايزين يروحوا حديقة الحيوان ..هو احنا جينا بدري ؟ ولا ايه؟

الموظف : لا لا يا باشا اتفضل .. يا نهار ابيض و الله نورتونا و نورتوا الحديقة كلها ..اتفضلوا اتفضلوا ..

انا : طيب خمس تذاكر لو سمحت

الموظف ( هيتجنن من السعادة ) الله اكبر .. خمس تذاكر ..ربنا يباركلك فيهم ..اتفضل يا باشا ..

ودخلنا حديقة الحيوان ..

مفيش نفس .. هص .. ترمي الابرة ترن .. ترش الملح ينزل عادي .. ايه ده ؟ تعالوا يا عيال نرجع تاني ..

يا عم انت .. يا اباااه .. اصحى بقى .. انتو لسه مفتحتوش و لا ايه؟ ..

لأ فتحنا يا باشا .. ادخل الطريق الطويل اللي في وش سعاتك ده و اخره يمين بقى ..

ماشي شكرا و خليك صاحي بقى عشان ده اكل عيش .. مليتوا البلد ..

ناصحا العيال : .. بصوا يا عيال .. هي موتة و لا اكتر ..هنتفسح يعني هنتفسح .. كل واحد يمسك في ايد اخوه مش عارفين داخلين على ايه .. ربنا يستر …

يا ترى هيحصل ايه بعد ما نمشي الطريق الطويل .. و ندخل يمين .. ده اللي هنعرفه في الجزء التاني

قصيدة لثوار التحرير : فضوا الميدان

 

فضوا الميدان

يا اهل الميدان يا ثاير

فضوا الخيام للجاير

تلقوا البلد هياها

لسه الطرق معرجة

كسروا بايدكم خيامكم

و اندموا على سيل دمامكم

 لكلمة الحرية اياها

و لشعب مفيهوش الرجا

يا اهل الميدان يا فاير

لفوا العيون ف دواير

تلقوا الايادي ملجمة

و ظهورنا لسه مسرجة

ياللي غرست الوتد

مديت فوق راسك قماشك

جرب تهج م البلد

بالذمة مين حاشك

غيرش تحب المكلمة

غيرش تحب البهرجة

ياللي ناضلت وغويت

 نومة الاسفلت

ارحل و عود للبيت

يكفي كدة اتبهدلت

بنعاقبك على نومتك

بالجلد و الكربجة

يا طير ياللي بتطير

احذر هنا سكوتك

متعديش فوق التحرير

و افلت بدل موتك

يا تشيل معاك شومتك

و تفهم العربجة

كفاك يا عم امشي

سيب الميدان لناسه

العدل ما يعشي

و الظلم ف وناسه

يا اهل الميدان يا ثاير

فضوا الخيم للجاير

و يا جيشنا بحكومتك

روح فضه للبلطجة

اشهدي يا مصر انى

كنت رايد ليكي خير

و اني ماشي غصب عني

و اني مش راجع بخير

اشهدي يا مصر لجلك

خدي داق طعم الرصيف

قلت انا في الحق رجلك

قالوا زودها السخيف

اشهدي يا مصر ياما

الظلم راجع متجهلك

كانوا فين الشعب لما

نهبوا فيكي و زادوا جهلك

 يا جيشنا مين اللي ضمن

و مين اللي فرط فالوليد

و مين هيدفع التمن

عفوا .. لقد نفذ الرصيد

 

قصة شاب من شباب الثورة : أنا عجوز شويا عندي 85 سنة

 بعد صلاة الجمعة في القائد ابراهيم .. بدأت المظاهرات تمشي في اتجاهين ناحية ميدان سيدي جابر و ناحية قلعة قايتباي .. انا كنت من الناس اللي رايحة ناحية القلعة .. و احنا في نص الطريق عند محطة الرمل كدة ..جزء من الناس بعربية بميكرفون قرروا انهم يروحو عند مبنى امن الدولة يتظاهروا قدامه .. لكن الاغلبية فهمتهم ان الجيش بيحمي المبنى و عايزين نتجنب الاحتكاك مع الجيش عشان نفضل ايد واحدة و كملنا في عز الشمس الحارقة بتاعت النهاردة في طريقنا للقلعة .. في الطريق سند عليا راجل عجوز ..لابس جلابية خضرة و كوفية سودة و شعره ابيض جدا .. عجوز .. قاللي " معلش يا ابني .. هسند عليك عشان انا راجل عجوز .. البركة فيكم انتم .." قلتله " لا و لا يهمك اتفضل"..قاللي "انتم الشباب زي الفل .. انا طول عمري كنت بحلم اعيش يوم زي ده ..انتم مش اللي بتخربوا و لا بتعملوا فوضى ..الشاب المصري ده زي الفل .. اللي بيخربوا هما مش انتم .. اوعى تصدق ان واحد زيك بيخرب ..دول البلطجية بتوعهم .. و اوعى تصدق ان الشباب هما اللي عملوا كل ده .. ده ربنا يا ابني .. ربنا اللي نصر الشباب و اداهم الالهام ده عشان يتحركوا و يصمدوا قدام الفساد .. انا عايش من ايام الملك فاروق .. كنا عايشين احسن من كدة يا ابنى و الله و قالوا عنه انه فاسد ..تعرف انا مرة انا و جماعة صحابي كنا قاعدين في البلد في الغيط بناكل مش .. جبنة قديمة يعني على قدنا .. و كان هو معدي .. قالنا ايه بتكلوا ايه ؟ و قعد كل معانا ..جمال عبد الناصر .. كان بيمشي في الشارع يسلم علينا بايده و لا حرس و لا كل ده .. ده كان بينزل يمشي جنب عربيته مش بيقعد جواها .. تعرف مين اللي ضربه في المنشية و هو بيخطب ..مش الشعب يا ابني..دول البشوات ..جمال هو اللي خلى البواب باشا و الباشا بواب .. عشان كدة هما اللي ضربوه ..بس هو زودها معاهم شويا ..اخد كل اراضيهم و املاكهم للدولة و هما اتعودوا يعيشوا باشوات من جد لجد .. انما اللي كانوا حكمنا دول مش مصريين .. هما دول مصريين ؟ و الله ما مصريين .. لا يمكن يكونوا مننا .. دول مش حاسين يعني ايه الشعب المصري ...ايام عبد الناصر .. كنا اتنين بس اللي نعملهم تعظيم سلام ..و هما ماشيين جنبنا في الشارع .. ظابط الجيش .. و الطالب .. الطالب ده كان بالنسبالنا حاجة قيمة اوي .. انما دلوقتي الواد ياعيني شاب زي الورد زيك كدة .. و يوقفه حتت مخبر معهوش ابتدائية حتي .. يوريله كارت بتاعه انه طالب .. يرميه في وشه .. و لو ابن فلان و لا علان و حمار يقولوا يا باشا و يا بيه .. بص يا ابني انا مش هعيش قد اللي عشته تاني و لا ربعه حتى .. بس لو مصر حصلها اللي حصل فيها زمان .. و كنت انت عجزت ..زيي كدة .. متفقدش الامل .. هيبقى فيها شباب برضه يرجعولها حقها ..الشعب ده مبيموتش ابدا .. بس اوعوا تسبوها ترجع تاني .. و اوعى يا ابني تكون ظالم .. الظلم وحش اوي .. و مهما كان الظالم ربنا اقوى منه .. مش كدة و لا ايه ؟ .. هما اللي جابوه لنفسهم .. ما تسيبوا الشباب يتكلم و يقول عايز ايه .. هو غلب و كتمة .. يعني و لا لاقي شغل و لا كرامة حتى .. الشباب كلها مش لاقيه شغل و اللي بيتعلم زي اللي مبيتعلمش .. و كله عايز يهج و يسيبلهم البلد ..بس البلد دي خيرها ياما ..كملوا يا عيالي ربنا يكرمكم و يسهلكم امركم.. انتم شباب زي الفل .. انتم كلكم كدة و لادي .. لا احفادي انا عجوز شويا ..و مصر دي عروستكم .. مصر عروسة الدنيا دي .. ربنا كرمها في كتابه و شوف ذكرها كام مرة ..عشان كدة ربنا حافظها بشباب زي الورد زيكم كدة ...مذكرش حسني في القرآن .." هقفل عند الجملة دي..عشان عجبتني اوي .. واضح في البداية انه كان بيكلمنى انا بس و بعدين استخدم صيغة الجمع .. و ده عشان كلامه الجميل..خلى فيه تلات او اربع شباب تانيين يسمعوله معايا .. كل كلامه عجبني ... هكتبه شويا شويا .. لسه ..اخدت منه حواديت و تفاصيل كتير جدا..لولا ان هو فاجئني و مارضتش اخليه يبطل يسترسل ..كنت صورته بالكاميرا .. بس انا قولت بلاش احسن .. و قررت اني اخلى دماغي تسجيل يحفظ كلامه كلمة كلمة باسلوبه .. عشان لما انقله يوصل للقلب زي ما كان طالع من قلب شاب فوق الخمسة و تمانين سنة.. هو ده اللي حصل بالحرف و الله على ما قلت شهيد ..