اليوم الاخبر : دايما كنت بسمع عنه اول مرة اشوفه - الجزء الاول

الطفولة .. اكتر حاجة بفتكرها و انا صغير .. الفسح و الناس اللي فسحتني ..و دايما شايل لهم الجميل ده و لغاية دلوقتي بحب ناس اوي بس عشان فسحتني وانا صغير ..فقررت اني لازم اسيب ذكرى حلوة عند حد ..و كأي واحد مش متجوز .. قررت أخد العيال حديقة الحيوان .. اكيد مش عيالي يا عم بقولك مش متجوز .. اطفال العيلة .. لينا الشهيرة بلولو ..مأوحة و غلباوية .. ريتال الشهيرة بروتي ..هادية موت .. فارس الشهير بتيتو ..بلطجي ومسجل خطر.. عمر الشهير بموري ..غلبان و ابن حلال مصفي بيصدق اي حاجة ..

اطفالي الحلوين .. انا قررت اوديكم النهاردة حديقة الحيوااااااان .. فرحة لا توصف .. هيصة ما بعدها هيصة .. امل في فسحة احلى شوفتها في عيونهم.. و جاء اليوم المرتقب .. يالا اركبوا .. تحبوا تسمعوا اغاني؟ .. ااااه

تسمعي اغنية ايه يا لولو؟ ..احب اسمع اغنية حجرين عالشيشة ..

مين؟.. (مسبهلا ) .. يا امي انتي بيبي ..حاولي تساعديني اعيش اللحظة يا لولو اني بفسح بيبيهات ..فاهمة حاجة؟

تسمعي ايه يا روتي يا حبيبتي؟ اسمع الواحد واقف مظبوط و الاتنين بتبص عليه .. و التلاتة بسنـــ ...

(مقاطعا) ماشي ماشي محمد فؤاد يعني ...

تسمع ايه يا تيتو ؟ .. يا عم اي حاجة ايه الأيف ده

ياض انت الفسحة لسه طويلة اتلم لا اناولك ...

تسمع ايه يا موري يا طيب انت ؟

موري يضحك ..

تسمع ايه؟ بتحب اغنية ايه؟

موري يضحك اكثر ..

لأ كدة مش هنخلص .. انا هختارلكم اغنية هتعجبكم اوي بجد

وبدأت الاغنية :

ما نرضااااش يخاصم الجمر السماااا ما نرضاش تدوس البشر بعضهاا يموت جواا جلبي ندااا

و الاغنية قربت تخلص خلاص .. يهمني الانسان ولو ما لوش عنوان يا ناس يا ناس ..هي دي الحدوته
حدووووته مصرية

انا منسجما : حدوووتة مصرية حدووتة مصريييية ..هيييه الله عليك يا كينج .. ها ايه رايكم في الاغنية؟

ايه رايكم يا عيال ؟ ..لولو ؟ روتي ؟ تيتوو؟ موووري؟

( محبطا ) انتم نمتم ؟!! .. طيب

وصلنا حديقة الحيوان .. اصحوا يا عيال وصلنا خلاص .. يالا يالا .. حظكم حلو اوي يظهر ان احنا جينا بدري ..الحديقة فاضية و مفيش طوابير على شباك التذاكر زي ما كنت باجي زمان .. ياه ياولاد زمان بقى ..

تيتو مقاطعا : يا عم خيصنا بقى هندخي ويا يأه

انا : هندخل يا بجرة .. انزلوا يالا ..

و على شباك التذاكر موظف نايم ..لو سمحت ..لوسمحت معلش (مهشكا كتفه ) ..قلقناك في نومتك بس اصل العيال شبطوا عايزين يروحوا حديقة الحيوان ..هو احنا جينا بدري ؟ ولا ايه؟

الموظف : لا لا يا باشا اتفضل .. يا نهار ابيض و الله نورتونا و نورتوا الحديقة كلها ..اتفضلوا اتفضلوا ..

انا : طيب خمس تذاكر لو سمحت

الموظف ( هيتجنن من السعادة ) الله اكبر .. خمس تذاكر ..ربنا يباركلك فيهم ..اتفضل يا باشا ..

ودخلنا حديقة الحيوان ..

مفيش نفس .. هص .. ترمي الابرة ترن .. ترش الملح ينزل عادي .. ايه ده ؟ تعالوا يا عيال نرجع تاني ..

يا عم انت .. يا اباااه .. اصحى بقى .. انتو لسه مفتحتوش و لا ايه؟ ..

لأ فتحنا يا باشا .. ادخل الطريق الطويل اللي في وش سعاتك ده و اخره يمين بقى ..

ماشي شكرا و خليك صاحي بقى عشان ده اكل عيش .. مليتوا البلد ..

ناصحا العيال : .. بصوا يا عيال .. هي موتة و لا اكتر ..هنتفسح يعني هنتفسح .. كل واحد يمسك في ايد اخوه مش عارفين داخلين على ايه .. ربنا يستر …

يا ترى هيحصل ايه بعد ما نمشي الطريق الطويل .. و ندخل يمين .. ده اللي هنعرفه في الجزء التاني