بعد صلاة الجمعة في القائد ابراهيم .. بدأت المظاهرات تمشي في اتجاهين ناحية ميدان سيدي جابر و ناحية قلعة قايتباي .. انا كنت من الناس اللي رايحة ناحية القلعة .. و احنا في نص الطريق عند محطة الرمل كدة ..جزء من الناس بعربية بميكرفون قرروا انهم يروحو عند مبنى امن الدولة يتظاهروا قدامه .. لكن الاغلبية فهمتهم ان الجيش بيحمي المبنى و عايزين نتجنب الاحتكاك مع الجيش عشان نفضل ايد واحدة و كملنا في عز الشمس الحارقة بتاعت النهاردة في طريقنا للقلعة .. في الطريق سند عليا راجل عجوز ..لابس جلابية خضرة و كوفية سودة و شعره ابيض جدا .. عجوز .. قاللي " معلش يا ابني .. هسند عليك عشان انا راجل عجوز .. البركة فيكم انتم .." قلتله " لا و لا يهمك اتفضل"..قاللي "انتم الشباب زي الفل .. انا طول عمري كنت بحلم اعيش يوم زي ده ..انتم مش اللي بتخربوا و لا بتعملوا فوضى ..الشاب المصري ده زي الفل .. اللي بيخربوا هما مش انتم .. اوعى تصدق ان واحد زيك بيخرب ..دول البلطجية بتوعهم .. و اوعى تصدق ان الشباب هما اللي عملوا كل ده .. ده ربنا يا ابني .. ربنا اللي نصر الشباب و اداهم الالهام ده عشان يتحركوا و يصمدوا قدام الفساد .. انا عايش من ايام الملك فاروق .. كنا عايشين احسن من كدة يا ابنى و الله و قالوا عنه انه فاسد ..تعرف انا مرة انا و جماعة صحابي كنا قاعدين في البلد في الغيط بناكل مش .. جبنة قديمة يعني على قدنا .. و كان هو معدي .. قالنا ايه بتكلوا ايه ؟ و قعد كل معانا ..جمال عبد الناصر .. كان بيمشي في الشارع يسلم علينا بايده و لا حرس و لا كل ده .. ده كان بينزل يمشي جنب عربيته مش بيقعد جواها .. تعرف مين اللي ضربه في المنشية و هو بيخطب ..مش الشعب يا ابني..دول البشوات ..جمال هو اللي خلى البواب باشا و الباشا بواب .. عشان كدة هما اللي ضربوه ..بس هو زودها معاهم شويا ..اخد كل اراضيهم و املاكهم للدولة و هما اتعودوا يعيشوا باشوات من جد لجد .. انما اللي كانوا حكمنا دول مش مصريين .. هما دول مصريين ؟ و الله ما مصريين .. لا يمكن يكونوا مننا .. دول مش حاسين يعني ايه الشعب المصري ...ايام عبد الناصر .. كنا اتنين بس اللي نعملهم تعظيم سلام ..و هما ماشيين جنبنا في الشارع .. ظابط الجيش .. و الطالب .. الطالب ده كان بالنسبالنا حاجة قيمة اوي .. انما دلوقتي الواد ياعيني شاب زي الورد زيك كدة .. و يوقفه حتت مخبر معهوش ابتدائية حتي .. يوريله كارت بتاعه انه طالب .. يرميه في وشه .. و لو ابن فلان و لا علان و حمار يقولوا يا باشا و يا بيه .. بص يا ابني انا مش هعيش قد اللي عشته تاني و لا ربعه حتى .. بس لو مصر حصلها اللي حصل فيها زمان .. و كنت انت عجزت ..زيي كدة .. متفقدش الامل .. هيبقى فيها شباب برضه يرجعولها حقها ..الشعب ده مبيموتش ابدا .. بس اوعوا تسبوها ترجع تاني .. و اوعى يا ابني تكون ظالم .. الظلم وحش اوي .. و مهما كان الظالم ربنا اقوى منه .. مش كدة و لا ايه ؟ .. هما اللي جابوه لنفسهم .. ما تسيبوا الشباب يتكلم و يقول عايز ايه .. هو غلب و كتمة .. يعني و لا لاقي شغل و لا كرامة حتى .. الشباب كلها مش لاقيه شغل و اللي بيتعلم زي اللي مبيتعلمش .. و كله عايز يهج و يسيبلهم البلد ..بس البلد دي خيرها ياما ..كملوا يا عيالي ربنا يكرمكم و يسهلكم امركم.. انتم شباب زي الفل .. انتم كلكم كدة و لادي .. لا احفادي انا عجوز شويا ..و مصر دي عروستكم .. مصر عروسة الدنيا دي .. ربنا كرمها في كتابه و شوف ذكرها كام مرة ..عشان كدة ربنا حافظها بشباب زي الورد زيكم كدة ...مذكرش حسني في القرآن .." هقفل عند الجملة دي..عشان عجبتني اوي .. واضح في البداية انه كان بيكلمنى انا بس و بعدين استخدم صيغة الجمع .. و ده عشان كلامه الجميل..خلى فيه تلات او اربع شباب تانيين يسمعوله معايا .. كل كلامه عجبني ... هكتبه شويا شويا .. لسه ..اخدت منه حواديت و تفاصيل كتير جدا..لولا ان هو فاجئني و مارضتش اخليه يبطل يسترسل ..كنت صورته بالكاميرا .. بس انا قولت بلاش احسن .. و قررت اني اخلى دماغي تسجيل يحفظ كلامه كلمة كلمة باسلوبه .. عشان لما انقله يوصل للقلب زي ما كان طالع من قلب شاب فوق الخمسة و تمانين سنة.. هو ده اللي حصل بالحرف و الله على ما قلت شهيد ..
ليست هناك تعليقات:
إرسال تعليق