قالك ايه قالك أه .. قالك كل شئ يمر في مصر يتمصر حتى الطبيعة عندها تتمصر .. قالك احنا الريادة و لينا الاسبقية في كل شئ .. ما هي مصر ام الدنيا يا عم .. احنا اللي بنينا الاهرامات و مش واحد ولا اتنين لأ تلاتة ده غير الصغيرين اللي لسه بيلاقوا فيهم لغاية دلوقتي ؟ و ده ليه ؟ عشان بتوع الاثار عندنا قلبهم ابيض و بتاع ربنا و ربنا بيكتبلهم في كل خطوة هرم صغنون ...و احنا اللي اخدنا كاس امم افريقيا تلات مرات ورا بعض .. صحيح بعد كدة شيلنا من النيجر و سيراليون اللي الكورة فكرتنا انهم بلاد معانا في افريقيا ..بس شيلنا و مش من فراغ و ده ليه؟ عشان المنتخب بتاعنا كله كان في مصطفى محمود و بيعيط مع بتوع احنا اسفين يا ريس و مش فاضي طبعا للتدريب و الكلام الفاضي ده ... يعني ايه عايزين يخلعوا الريس ؟ و احنا لما نيجي من البطولة اللي مش هنروحها دي مين هيستقبلنا في المطار؟ ..
 | |
| متسبنيش يا مستتني .. ده جايبلي النابوليا بالشئ الفلاني |
قصر الكلام عشان بحب اجيب من الاخر و اقول المختصر المذيب ..مصر دولة عايشة في عالم لوحدها ملكوت تاني خالص ..مفيش حاجة عندها اسمها الطبيعي و العادي و المفروض ... لأ في مصر المفروض ده عند المكوجي بس ! يعني احنا اللي عملنا الثورة وفي عز الثورة و الرصاص المطاطي و الحي و القنابل المسيلة للعياط قعدنا نهزر و بعدين خلعنا المخلوع و نضفنا الميدان و روحنا .. ده على اساس ان احنا رايحين يوم شم النسيم في الازهر بارك يعني؟ تصدقوا ان دي كانت ثورة .. حتى لما قفشنا جاسوس من كام يوم عمّال يصور نفسه و يرفع الصوّر على الموقع الموسادي السري " فيكبوص " ..الجاسوس صعب علينا و قعدنا نضحك برضه و كنا هنعمل جمعة " سيبوه الهي ربنا ما يرميكم في ضيقة " و البنات عاملين حملة " حرام عليكم سبوه سبوه الجاسوس سو كيوت ".. ايوة يا عم الله يسهلك .. مبقتش جاسوس من فراغ ..لازم برضه الجاسوس يبقى له طلته و هيبته كدة و يبقى باين عليه أنه جاسوس يعني ..
..مش قلتلكم في مصر المفروض ده عند المكوجي .. اول مرة اشوف شعب بيحب اللي بيتجسس عليه و خايف على مصلحته .. الشعب بيقول لبعضه ..هو كدة الجاسوس مستقبله ضاع؟ دي لو ثبتت عليه تهمة التجسس هياخدله مش اقل من ست شهور مثلا ..
 |
| حاضن الجاسوس و فرحان أوي يا خويا ..طيب هاتووه هو و الهرم اللي ورا ده |
و من ضمن العجائب و الغرائب و الطرائف اللي بنطير نجبهالكم من كل مكان في العالم انا و جلال علام ... قانون منع التظاهر و الاعتصام ... يا نهار ضحك .. يا عم ما انا قلتلك بقى المفروض في مصر عند المكوجي .. هي دي الثورة اللي قامت عشان تمنع الثورة .. اه والله ..عملنا ثورة عشان منثورش بقى .. انا لو اعرف ان من اهداف الثورة القانون ده؟ كنت روحت مصطفى محمود بوست ايد الست بتاعت يا سيات اللوا مشير الطنطاوي .. كنت هروح اطلب منها تسامحني و اقولها ظلمناكي يا طاهرة ... انتي اللي طلعتي بتفهمي و الشعب كله كان في البلالاة ..
 |
| احنا اسفين يا غالية .. و اسفين يا سيات اللوا مشير الطنطاوي |
بقى احنا كنا مش طايقين المخلوع عشان كنا بنتظاهر و بنعتصم و كنا بنقول لا يأس مع الحياة ولا حياة لمن تنادي و بنيجي على نفسنا و نقف في عز الشمس الحر اللي كنا فيه ده على سلم اي نقابة و حوالينا الامن المركزي حبيبنا حاضنا و مخلي باله مننا و لا كنا بنضرب بعصيان و لا كنا بنتشال زي الفسيخة و نتحط في اي ميكروباص رايح امن الدولة و لا اي حاجة خالص .. و رغم الحرية العسل اللي كنا فيها دي .. برضه مكنش عاجبنا و عملنا ثورة .. نقوم بعد ما نعمل ثورة .. تلغوا الثورة ..كلام عيال هو بقى؟ .. بتخوني يا عصام .. ايش حال مكنتش انا اللي مديك الشرعية و مسلمهالك تسليم اهالي عروسة و متزوقة على المفتاح .. بعد ما أديك الشرعية تعمل فيا كدة ... هات الشرعية يا عصام.. انا مخاصمك .. و لا لسانك يخاطب لساني و لا لساني يخاطب لسانك .. و انا اللي قلت احلى من شرف مفيش يا اه يا اه .. اخص عليك يا توفيق الدقن .. اخص ...
 |
| هو مش أخص عليك اوي يعني .. ايه يا عم البصة دي |
ده مش كلام يا حاج يحيي؟ دي مش شروة مانجة اصلها ؟ انا وقعت مع هواة و لا ايه ياض يا حدوتة ؟ مش بروفيشنال خالص.. امبارح كان معايا ويجي النهاردة يطلع قانون ضدي ..شعبي اللي وثق فيا و نزل معايا من العمال و الفلاحين يقول عليا ايه؟ .. بديله على قفاه ..أنا كل ما اتقدم خطوة ترجعوني عشرة ورا .. بلغ عصام شرف احتجاجي الرسمي على قانون منع التظاهر و الاعتصام يا عصام .. يلعن ابو دي عشييين جنية يا اخي .. مش كان زمانك معتصم معايا دلوقتي ... التظاهر ده لكل الميدان .. كفايا كدة .. انزل بصورة ايام السادات يا عم ..
 |
| ايه يا عم ده؟ .. مش دي .. بقولك هيلغوا الثورة و انت قاعد تثور لوحدك .. الصورة التانية فين؟ |
 | |||
| ايوة هي دي بتاعت الراجل اللي حاطط نص برتقانة على دماغه .. الله يرحمك يا احمد ذكي |
سلام..
ليست هناك تعليقات:
إرسال تعليق