تدوينتي ضد التحرش الجنسي : انا مش عبد الفتاح القصري ..انا احمد زكي

فيه حاجات في مصر الناس فاكراها من اساسيات الحياة و من كماليات المراهقة ومن مراحل فترة الشباب .. يعني لو قلت لواحد أنا عمري ما شربت سجاير ولا كوكو الضعيف و لا حتى أمريكاني احمر .. مش هيصدقك .. و لازم تتقمص دور عبد المنعم حافظ " نعناعة" في فيلم صباحو كدب و تبدأ في القسم بكل ايمانات المؤمنين إنك فعلا معملتش كدة .. و يبدأ نعناعة يحلف للناس انه فعلا مش بتاع الحاجات دي .. و عزة جلالة الله..اقسم بالله العظيم و حياة ربنا و الله العظيم تلاتة انا عمري ما مشيت مخالف و لا كسرت اشارة مرور و لا ركنت في مكان صف تاني ! وحياة ربنا و يا رب لو بكذب انفجر انا عمري ما شربت سجاير ولا سادة ولا محشية افغاني و لا شربت حاجة اصفرة ولا اخضرة  ولا احمرة إلا لو عصير فراولة فريش ولا اتفرجت على افلام بورنو غير افلام ايناس الدغيدي .. ولا عمري اخدت رشوة على انها إكرامية  و رزق ربنا بعته ولا عمري غشيت في شغلي وروحت الصبح نمت على المكتب و لا زوغت من الشغل عشان أروّح بدري ! اه والله لأ و ايه كمان .. تصدق و تؤمن بالله أنا عمري ما اتحرشت ! اه  ولا حاولت اخون مراتي مع السكرتيرة بتاعتي " مسلسل الساعة خمسة وربع على القناة التانية " و لا فكرت اتحرش بـالشغالة اللي عندنا في البيت بعد ما مراتي بتروح شغلها الصبح " مسلسل الساعة تمانية  على القناة الاولى "  و حياة امي يا عم و شرف جوز خالتي ولا يا رب يطلع تنين من الارض دلوقتي يبلعني .. أنا عمري ما عاكست واحدة ولا بصبصت ولا الحاجات دي!  لا بس فعلا انا بجد عمري ما عاكست ! و مش بشتغلك صدقني .. لأن عندي اسبابي الشخصية بغض النظر عن إنها عيب أو حرام ! اولا انا مش بعاكس عشان بحس انها رخامة يعني ! و انا مالي باللي ماشية في الشارع دي ! اعرفها منين ولا تعرفني منين عشان أوجهلها كلام ! واحدة و نازلة لهدف معين رايحاله ! ارخم ليه و استظرف ليه عليها! و افرض احرجتني ! ده انا ممكن اقتلها ! انا كدة يا عم كرامتي في مناخيري .. يعني ابقى نازل في أمان الله ..ألبس إعدام ..طيب و على ايه ما الطيب أحسن ..  ثانيا واحدة بنت .. ليه تحسسها بالقلق او الخوف من الشارع .. ما هو ده اسمه ارهاب .. افرض بتعليقك الظريف .. افتكرت انك عايز تعمل فيها حاجة ولا اي نيلة .. ليه من الاساس ! هتستفاد ايه يا اهبل .. بدل ما تخلي البنت " اللي هي المفروض الكائن الرقيق الضعيف جسمانيا " تمشي في أمان و تنزل في اي وقت لو مضطرة تجيب حاجة في وقت متأخر .. لأ ! بالعكس بتزيدها خوف و ضعف و تخليها لو هتموت متنزلش لوحدها متأخر لحسن حد يعملها حاجة ! هل ده احساس بيشعرك بالرجولة؟

بتفكر في ايه يا دغف؟ لو اتحرشت بواحدة سببتلها انهيار عصبي و عقدة نفسية طول حياتها ..هتحس انك راجل؟

الطفل عامل زي العجينة اللي لسه بتتشكل ..لما بيشوف شئ بيترسخ في دماغه و في عقله الباطن و بتفضل عنده في خلفيته و في ذاكرته ! لما كل طفل بينزل الشارع كان بيشوف اللي بيعاكس و اللي بيبصبص و اللي بيتحرش بأيده بقى و اللي بيعك أي عك .. بيبدأ يفهم ان دي حاجات طبيعية و اللي قلت عليه في الاول بيحصل .. بيبدأ يحس ان هو لازم لما يكبر كدة و يطلعله شنب و يبقى شاب .. يعمل كدة لحسن يقوله عليه شاذ ولا حاجة .. و يا ريته شاذ عن الجماعة في إنه مش بيعاكس و كدة .. لأ في دي بالذات هيفتكروا إن شاذ يعني اللي هو بيبقى ... يلا مش مهم ..

بعت نفسك بكام يا ابراهيم؟ .. مقابل ايه يا ابراهيم؟

من الغباء ان احنا نقدم صور التحرش الجنسي و المعاكسات بشكل فكاهي و كوميدي في الافلام القديمة و الجديدة و الاعلانات التجاري و زي اعلانات قناة مولتي تتحدى الهبل  و الاغبى انك تتطلع البنت أو الست بيعجبها كدة.. أهو من باب رفع المعنويات و جبر الخواطرأو هدم المعنويات برضه و كسر الخواطر.. أنا مش هبقى عبد الفتاح القصري اللي كان بيعاكس فاتن حمامة و يقولها يا صفايح الزبدة السايحة يا براميل القشطة النايحة ! يا ارض احفظي ما عليكي .. و لما تعدي زينات صدقي  يقولها يا ارض اخسفي ما عليكي ..

متزعليش يا زوزو ..ركزي مع النابلسي كتاكيتو بني .. هو اللي عارف قيمتك

 لأ أنا ممكن ابقى زي صلاح ..

انت هتتفلحس علينا ولا ايه ؟ احنا اسفين يا صلاااااح

احمد ذكي في فيلم مستر كراتيه .. سايس الجراج اللي دافع عن نادية ..نهلة سلامة اللي شغالة في مكتبة شرايط فيديو  ضد تلات عيال صيع كانوا عايزين يتحرشوا بيها عشان شغلها متأخر ..صحيح صلاح بعد كدة ظبّط نادية .. بس هو كان في الاصل نيته سليمة و عمل كدة عشان هي بنت .. مش بس عشان معجب بيها ..

لا بجد مش كدة و كدة ! حماها عشان هي بنت منطقته و هو الجدع.. ثم ايه الغمزة دي ..انت بتتحرش بمين ياض؟

لو الطفل بطل يشوف مشهد عبد الفتاح القصري و غيره .. و شاف مشهد أحمد ذكي سواء حقيقي في الشارع أو تمثيل في التليفزيون .. في الافلام و المسرحيات .. هيتكون عنده مبدأ هيعيش معاه طول عمره .. و لو مقتنع بالكلام ده .. قول لنفسك دلوقتي تلات مرات .. أنا مش هبقى زي عبد الفتاح القصري .. أنا هبقى زي احمد زكي .. جربت اشوف معنى تحرش لغويا ففتحت المعجم الوجيز مادة ( حرش )  لقيته بيتحرش بالقارئ لفظيا لما يقوله إن معنى يتحرش هو يتعرض له ليهيجه .. يعني خلاص خلص الكلام ملقتوش غير المعني ده .. بس على رأي عبد الفتاح القصري اللي احنا مش هنبقى زيه .. أنا في عرض المجمع اللغوووووووي ...

تحذير : اللي هيعاكس هيبقى عامل كدة ..انا راضي ذمتكم ..ده شكل واحد يتحرش جنسيا بفرخة حتى؟

أنا مش هقولك ترضى حد يتحرش بأمك او بأختك أو بمراتك أو بنتك ؟ سواء تحرش جنسي باللفظ او بالاعتداء عليها جسديا؟ لأن ده سؤال عبيط و اجابته معروفه ! اكيد هتتحمأ أوي و عروقك هتنفر من رقبتك و وشك هيحمّر و هتقولي  لأ انت اتجننت و لا إيه ؟ قال حد يتحرش بأهلي قال .. ده انا كنت سيحت دمه ..!!

طيب يا عم بدل انت حمش كدة ما تحافظ على كل بنات الناس و اعتبرهم فعلا اهلك ! و كل واحد يبدأ بنفسه .. أنا عن نفسي أوعدك إني عمري ما هعاكس أمك و لا اختك ولا مراتك و لا بنتك .. بس لازم يا حلو بقى تردهالي .. لازم انت كمان تحافظ على أهلي .. و نبقى كلنا في البلد دي بجد .. اسرة مع بعضينا ..عايشين في سلام بيكفل لكل واحد و كل واحدة حريتها الشخصية في انها تختار زيّها اللي شايفة إنه مناسب ليها ..عشان نحس فعلا بالتغيير و بقيمة الثورة و عشان البنت متحسش انها قطعة جماد ماشية في الشارع مباحة لإن اي حد يعمل لها اي حاجة او يتحرش بيها بأي شكل كان .. البنت مش مطلوب منها انها تتحبس في الدولاب جوا بيتهم عشان انت مش عايز تتلم و أيدك أو لسانك طوال .. ابدأ بنفسك و خد القرار دلوقتي .. خد القرار حالا و من قلبك و بضمير مش كلام و خلاص و قول ورايا .. عشان خاطر مصر و عشان خاطر الثورة و عشان خاطر اهلي .. و عشان خاطر كل بنات مصر و عشان أنا محترم و عايز اتغير .. أنا مش هعاكس و لا هتحرش بأي واحدة جنسيا .. كمان عشان خاطر سمعة مصر .. و سمعة شباب مصر يا جدعان .. العالم يقول علينا ايه .. محرومين ..  و على نهج حمادة هلال اختم تدوينتي ..كلنا هنتفق في يوم التدوين ضد التحرش الجنسي  ان احنا ضد التحرش الجنسي عشان خاطر مصر و عشان ميجيش يوم نسمع فيه حد بيقول على مصر .. دي مبقتش بلد يا درويش ! دي بقيت اتوبيس يا درويش ...انا معايا ولايا يا درويش

انا قلت اللي عندي و رضيت ضميري و مش عايز حد يزعل مني .. سونة اجدع ناس

سلام ..