يا ارض خلي الجراح عايمة ماتغرقشي
يا صخر خلى الدمام سايلة ماتنشفشي
يا رمل من فوقك بدأ حياته شهيد
ثاير عنيد وعتيد خاف الرصاص منه ولا خافشي
خان الجبان سلميته و برائته اللي ف نيته
بالامس صلى على ميته اتاريه مايعرفشى
هينول الشهادة اليوم و لحد امتى يا قوم
يبقى القاتل معلوم ويعيش طليق ظالم
يبقى الجميع عالم وقال تحقيقنا ماكشفشي
حقاني اعمى وشاف و العدل ما شافشي
حقانى اعمي وشاف فتح عنيه دمه
لما رأله شهيد تبكي عليه امه
نازل عشان حقه هيموت ولا همه
كان كله همه يعيش و فيه حد مهتمه
نازل عشان بسمه يلقاها بين همه
نازل عشان ضحكة يضحكها يوم العيد
اتاريه عاش فالحياه طول عمره ماضحكشي
يا ارض خلي الجراح عايمة ماتغرقشي
على ضحكة العصفور فتح عنيه صبحه
فتح الشيشان للنور غطى الجمال قبحه
حضن الامل المترب اللي كان شايله
لعن اليأس المعقرب اللي كان دبحه
خطى على ملابسه زغلل عنيه بياضه
الهم راح لبسه و الحزن مصطاده
والفرح لونه ابيض فارقه ونسى معاده
يا حزن يا عنصري يا مضطهد فرحه
لو حزنه شاف ابيض ينزل عليه تسويد
اتاريه عاش فالحياه طول عمره مافرحشي
يا ارض خلى الجراح عايمة ماتغرقشي
لا اختار زمانه ولا مكانه و اهو خلق وسط اللي اتخلق
نازل يقول شكوته من قهرته وسط الشكاوي تتزنق
تلضم شكاوي فبعضها تعمل حبال تملا الملأ
حبال وصلبة كالجبال تربطنا بالحلم الورق
و تلف زي المشنقة و محندقة على رقاب اللي سرق
كان ظنه انه صوت النمل غير قابل للسمع
كان فكره انه خيال فالعين فجأة لمع
وكان مستني فعل الجن يعمل عمايل تتجمع
يعمل عمايل خلق الجان تفوق العزم يالانسان
نحتاجلها سيدنا سليمان يظهرلنا بقلب الميدان
تتلم حوالينه الجموع و تعمل للدموع فيضان
و ليه الخجل .. ده الحق حقك يا جمل
اصبر و صابر عالأمل مهما حصل
اصمد هتعمل معجزة و يقولوا عجبي لمن عمل
ليه الخجل ..ده الحق حقك يا بطل
و الحق حقك اطلبه
و شاور عاللي سرقه كمان
اطلب خلاص حريتك
اطلب تعيش كما الانسان
يا مصري مين فهمك
طلب الحقوق اسمه طمع
ولا إن صوت النمل غير قابل للسمع
ولا كان ده كله خيال فالعين فجأة لمع
نازل يثور على كتمته
يحدف كلامه اللي اتمنع
اتاريه عاش فالحياه مكتوم بالشوم والذل و التقييد
شاف الهوان و الذل عاش بينه متفشي
يا ارض خلى الجراح عايمة ماتغرقشي
يا مصر خلى الجراح ظاهرة كما زهرة
بريحة المسك تلف تعطر البساتين
يا مصر خلى الدمام طاهرة كما مهرة
تصول و تقوّم الميادين
خلى على الجدران
نفذة رصاص شرخة كما صرخة
بايد مغلولة كما غولة
تهب تحرر الزنازين
خلى فى كل اذان
دقة جرس كما حرس
بايد واحدة و متحدة
توزع أمن للخايفين
تذكرنا بصوت ترنيمة بين تراتيل
تورينا رصاصة كافرة و متوافرة
بلا معدود تعدي بين ضلوع محمود
تكمل بين دموع ميخائيل
تفكرنا ولما ظلمنا اخترنا
وسال الدم مالشرايين
بملة ودين مفرقشي
يا ارض خلى الجراح عايمة ماتغرقشي
يا صوت الحق يا مندّي
امانة بارضنا تعدي
تجمل حلمنا الوردي
ترجع حقنا الضايع
تزيد على طبعنا طبايع
تزيل رهبة كانت فيا
تبدل خوفي حرية
وطن عالحق متبايع
مشوفش بعيني تاني رصاص
تحط للهوان ده قصاص
يا زمن الظلم عدى خلاص
و يا عدل بات هنا عندي
و يا صوت الحق يا مندّي
أمانه بأرضنا تعدي
دم الشهيد دمك يجري ف شريانا
اوعى يضيع حلمه تنهد احلامنا
اوعى تفرط فيه اوعى ترجعنا
جمعنا مرة ميدان قادر يجمعنا
كان حلمه نفس حلمنا كان للوطن غنى
يتمنى حقك يا وطن كان بس يتمنى
يتمنى يحيا فيك احساس من بعد حرية
يتمنى يلمح مباسم ناس كت فيك مآسية
ضحكة صبية و ولد من اهل بيت البلد
شافوا نهار لبكرة لقوا للحياة معنى
حطوا عالجدار ذكرى تبقلنا قدامنا
حب الوطن بقى فرض
بعد أما كان سُنة
دم الشهيد دمك ضحابُه علشانا
قال الشهيد زيك يهتف ورا مقالنا
غاب الشهيد لكن دمه تبقّالنا
وساب هنا حلمه ببسمة وبآنه
و بفرحة مبتسمة خرجت وسط المدامع
قال الشهيد يا وطن يا كل من سامع
راجع انا وطني راجع و ايه المانع؟
لو كنت بتحبني بكرة انا راجع
بس انت صون العرض
وأمانة اوطانا
لو كنت بتحبني بكرة انا راجع
وعشان اعود للارض
خلى الوطن جنة
